жауынгерлік және оперативтік дайындық әдістемесі

(Методика боевой и оперативной подго-товки)

жеке құрамды ұрыста іс-қимыл жасауға үйрету мен тәрбиелеу әдістерінің, тәсілдері мен түрлерінің жиынтығы; әскери дидактиканың құрамды бөлігі. Әскери педагогиканың басты-басты қағидаларына негізделеді. Ж.о.д.ә. термині қарулы күштерде жауынгерлік және оперативтік дайындықтың құрамды бөлігі болып табылатын пәндерді оқытуда қолданылатын жалпы әдістер мен ұйымдастыру түрлерін қамтитын жиынтық ұғым ретінде қабылданған. Ж.о.д.ә-нің жалпы мазмұны: педагогика ғылымы мен ғылыми-техникалық прогрестің жаңа жетістіктерін пайдалана отырып әскери қызметшілерді оқытудың әдістемелері мен түрлерін дайындау; жауынгерлерді Отанын және халқын сүю рухында оқыту мен тәрбиелеудің ең тиімді әдістерін талдап дайындау; оқу процесінде оқыту-материалдық базасын пайдаланудың ең тиімді жолдарын анықтау; бағалау өлшемдерін, білім мен дағдыны тексеру жүйесін дайындау; командирлердің, штаб офицерлерінің, әскери мектеп, училище, институт және академия оқытушыларының әдістемелік шеберліктерін көтерудің жаңа әдіс-тәсілдерін іздеу және ескі әдіс-тәсілдерін жетілдіру; жақсы тәжірибелерді, жеке әдістемелерді тарату. Ж.о.д.ә. ұсыныстары нақты пәндерді оқыту әдістемесі бойынша оқулықтарда, әдістемелік нұсқауларда беріледі.